Цэс

Холбоо барих

Хоёр орны парламентын Тамгын газрын удирдлагууд хамтын ажиллагаагаа улам өргөжүүлэхээр тохиролцов

Тамгын газар хоорондын хамтын ажиллагааны үр өгөөжийг дээшлүүлнэ

    Монгол Улсын Их Хурлын Тамгын газрын Ерөнхий нарийн бичгийн дарга Ц.Цолмон Бүгд Найрамдах Социалист Вьетнам Улс (БНСВУ)-ын Үндэсний Ассамблейн Тамгын газрын даргын урилгаар энэ сарын 14-18-ны өдрүүдэд тус улсад айлчлав.

     Айлчлалын хүрээнд Улсын Их Хурлын Тамгын газрын ерөнхий нарийн бичгийн дарга Ц.Цолмон, БНСВУ-ын Үндэсний Ассамблейн Тамгын газрын дарга Нгуен Хан Фук нар албан ёсны уулзалт хэлэлцээ хийлээ.


     Үндэсний Ассамблейн Тамгын газрын дарга Нгуен Хан Фук юуны өмнө урилгыг нь хүлээн авч албан ёсны айлчлал хийж буйд Монгол Улсын Их Хурлын Тамгын газрын Ерөнхий нарийн бичгийн даргад талархал илэрхийлээд “Таны энэ удаагийн айлчлалд Үндэсний Ассамблейн Тамгын газар төдийгүй Үндэсний Ассамблейн удирдлагууд өндөр ач холбогдол өгч байгаа. Иймээс айлчлал амжилттай болж, хоёр орны парламент, түүний Тамгын газрын харилцаа, хамтын ажиллагааг шинэ шатанд гаргахад бас нэг чухал алхам болно гэдэгт итгэж байна” гэдгээ онцлов.

    Улсын Их Хурлын Тамгын газрын Ерөнхий нарийн бичгийн дарга Ц.Цолмон уулзалтын эхэнд БНСВУ-ын Үндэсний Ассамблейн Тамгын газрын даргын урилгаар олон жилийн уламжлалт найрсаг харилцаатай Вьетнам Улсад айлчилж буйдаа баяртай байгаагаа илэрхийлээд сүүлийн жилүүдэд хоёр орны  харилцаа, хамтын ажиллагаа бүх хүрээнд өргөжиж, төр, засгийн өндөр дээд түвшний айлчлал, уулзалт яриа хэлэлцээ тогтмолжиж, хамтын ажиллагаа улам өргөжин хөгжиж байгааг дурдав. Мөн хоёр орны харилцаа, хамтын ажиллагааг өргөжүүлэн хөгжүүлэхэд парламент хоорондын хамтын ажиллагаа чухал үүрэгтэй бөгөөд энэ талаар Монгол Улсын Их Хурал, БНСВУ-ын Үндэсний Ассамблей, түүний Тамгын газрууд үр өгөөжтэй хамтран ажиллаж, парламентын өндөр дээд түвшний болон найрамдлын бүлгүүд, гишүүдийн уулзалт, яриа хэлэлцээ тогтмолжиж, Тамгын газрын хооронд хамтын ажиллагааны протокол байгуулан хэрэгжүүлж буйд баяртай байгаа, хамтын ажиллагааны энэхүү уламжлалыг цаашид шинэ агуулгаар улам баяжуулан хөгжүүлэхийн төлөө байгаагаа онцлон тэмдэглэлээ.    


     БНСВУ-ын Үндэсний Ассамблейн Тамгын газрын дарга Нгуен Хан Фук Үндэсний Ассамблейн зүгээс Монгол Улсын Их Хуралтай бүх талаар хамтран ажиллахад бэлэн байна. Хоёр орны парламентын Тамгын газар хооронд хамтын ажиллагааны протокол байгуулсан нь парламентын харилцааг хөгжүүлэхэд чухал ач холбогдолтой баримт бичиг гэж бид өндрөөр үнэлдэг. Цаашид хоёр парламентын найрамдлын бүлгүүд, Тамгын газар улам нягт хамтран ажиллах өргөн боломжтой гэж үзэж байна. Тухайлбал, жил бүр Тамгын газрын удирдлагууд харилцан айлчилж хууль тогтоох байгууллагуудад туслах үйл ажиллагааныхаа чиглэлийн талаархи санаа бодол, сайн туршлага, бас алдаа оноогоо хуваалдцаг байх, Тамгын газрын зарим газар, хэлтсийн ажилтнууд, ялангуяа судалгааны ажилтнуудыг солилцож туршлага судлуулах зэргээр хамтарч ажиллах саналтай байгаагаа илэрхийлэв.

    Улсын Их Хурлын Тамгын газрын Ерөнхий нарийн бичгийн дарга Ц.Цолмон Үндэсний Ассамблейн Тамгын газрын даргын саналыг дэмжиж буйгаа илэрхийлээд хоёр улсын парламент, түүний найрамдлын бүлгүүд, гишүүд, Тамгын газрын харилцаа, хамтын ажиллагааг улам өргөжүүлэх, энэ чиглэлээр хоёр орны парламентын Тамгын газрын хооронд байгуулсан хамтын ажиллагааны протоколыг хэрэгжүүлэхийн төлөө байгаагаа онцлон тэмдэглэв. Цаашид хоёр талын хамтын ажиллагааны хүрээнд парламентын Тамгын газрын номын сан, архив, судалгааны нэгж, хэвлэл мэдээлэл гээд бүх талаар хамтран ажиллаж ажлын шинэ арга хэлбэр, сайн туршлагаа хуваалцах, ажилтнуудаа солилцож сургаж дадлагажуулах саналтай байгаагаа илэрхийллээ.

    Мөн БНСВУ-ын Үндэсний Ассамблейн Тамгын газрын даргыг Монгол Улсад айлчлах урилгыг дахин нотлоод тааламжтай цагтаа айлчлахыг урилаа.

БНСВУ-ын Үндэсний Ассамблейн дэд даргад бараалхав

     Монгол Улсын Их Хурлын Тамгын газрын Ерөнхий нарийн бичгийн дарга Ц.Цолмон айлчлалынхаа хүрээнд БНСВУ-ын Үндэсний Ассамблейн дэд дарга ноён Уонг Чью Лю-д бараалхав.


     Үндэсний Ассамблейн дэд дарга ноён Уонг Чью Лю уулзалтын эхэнд Үндэсний Ассамблейн Тамгын газрын даргын урилгаар тус улсад албан ёсоор айлчилж буйд нь Монгол Улсын Их Хурлын Тамгын газрын Ерөнхий нарийн бичгийн даргад баяр хүргэж, айлчлалд амжилт хүсээд хоёр орны хууль тогтоох дээд байгууллагын харилцаа сүүлийн жилүүдэд улам идэвхжиж, өндөр дээд түвшний айлчлал, Байнгын хороод, найрамдлын бүлгүүд, Тамгын газар хоорондын харилцаа өөдрөг сайн байгаад баяртай байгаагаа онцлов. Мөн 2015 онд тус улсад болсон Олон Улсын Парламентын Холбооны ээлжит чуулганы үйл ажиллагаанд Монголын парламент ач холбогдол өгч төлөөлөгчдөө оролцуулсан, түүнчлэн олон улсын хамтын ажиллагааны механизмд хоёр тал бие биедээ харилцан дэмжлэг үзүүлэх чиглэлээр хамтран ажиллаж байгаад баяртай байдгаа илэрхийллээ.

     Түүнчлэн ирэх оны эхээр тус улсаас зохион байгуулах Ази, Номхон далайн парламентчдын ээлжит чуулганд Монгол Улсын Их Хурлын даргыг оролцохыг албан ёсоор урьж буйг дуулгалаа. Түүнчлэн Монгол Улсын Их Хурлын Тамгын газрын Ерөнхий нарийн бичгийн даргын энэ удаагийн айлчлалын хүрээнд болсон уулзалт хэлэлцээний үеэр хоёр тал харилцаа, хамтын ажиллагаагаа цаашид улам өргөжүүлэхээр санал нэгдсэн явдалд баяртай байгаагаа онцолсон юм.


     Улсын Их Хурлын Тамгын газрын Ерөнхий нарийн бичгийн дарга Ц.Цолмон “Үндэсний Ассамблейн Тамгын газрын даргатай хийсэн энэ удаагийн уулзалт хэлэлцээ хоёр орны Тамгын газар хоорондын төдийгүй парламент хоорондын харилцаа, хамтын ажиллагааг хөгжүүлэхэд чухал ач холбогдолтой боллоо гэж хувьдаа үзэж байна. Сүүлийн жилүүдэд хоёр орны парламент хоорондын хамтын ажиллагаа улам өргөжиж, хууль тогтоох байгууллагын өндөр дээд түвшний айлчлал, Байнгын хороод, найрамдлын бүлгүүд, гишүүдийн харилцан айлчлал, уулзалт тогтмолжиж байна. Тэр дундаа хоёр орны парламентын Тамгын  газар хооронд байгуулсан хамтын ажиллагааны протокол үр өгөөжөө өгч буйд баяртай байдаг” гэдгийг онцлон дурдлаа.

     Мөн “Ирэх оны эхээр тус улсад болох Ази, Номхон далайн парламентчдын ээлжит чуулганд Монгол Улсын Их Хурлын даргыг оролцохыг урьсан Таны урилгыг Монгол Улсын Их Хурлын даргад өөрийн биеэр уламжлах болно” гэдгээ илэрхийлэв.

     Түүнчлэн хоёр орны  хууль тогтоох дээд байгууллагын Тамгын газрын харилцаа, хамтын ажиллагааг цаашид улам өргөжүүлэх өргөн боломж байна гэж хувьдаа үзэж байгаа. Энэ чиглэлээр Тамгын газрын бүх газар, хэлтсийн хамтын ажиллагааг өргөжүүлэх, мөн парламентын номын сан, архив, студи зэрэг тодорхой чиглэлээр ажлын арга барил, сайн туршлагыг судалж хуваалцах боломжтой гэдгийг дурдлаа.

   Хоёр орны харилцаа, хамтын ажиллагаанд нөөц боломж их байгаа. Юуны өмнө хоёр орны худалдааны эргэлтийг улам нэмэгдүүлэх нь чухал ач холбогдолтой, мөн хөдөө аж ахуй, хөнгөн үйлдвэрийн салбарын хамтын ажиллагааг улам өргөжүүлж, энэ чиглэлээр Вьетнам Улсаас жимс, жимсгэнэ, бэлэн хувцас, цахилгаан бараа зэрэг олон нэр төрлийн бараа, бүтээгдэхүүн нийлүүлэх боломжтой. Мөн өмнө нь оюутан сургаж дээд боловсрол эзэмшүүлж байсан  уламжлал, туршлагадаа суурилан хоёр талаас суралцагчдын тоог нэмэгдүүлэх боломжтой байгааг Үндэсний Ассамблейн дэд дарга уулзалтын үеэр онцолж байв.

    Уулзалтад Монгол Улсаас БНСВУ-д суугаа Элчин сайдын яамны Хэргийг түр хамаарагч С.Энхцэцэг байлцлаа гэж Улсын Их Хурлын Хэвлэл мэдээлэл, олон нийттэй харилцах хэлтэс мэдээлэв.

Хуваалцах:

Холбоотой мэдээлэл