Цэс

Холбоо барих

Өргөдлийн байнгын хороо Богд хан уул, Туул голын эрэг орчмын асуудлыг цэгцлэх талаар Засгийн газарт чиглэл өгөн, хяналт тавин ажиллаж байна


Улсын Их Хурлын Өргөдлийн байнгын хорооноос өнөөдөр (2018.07.03)  2018 оны хаврын ээлжит чуулганы хугацаанд хийсэн үйл ажилллагааныхаа талаар сэтгүүлчдэд мэдээлэл хийлээ. Хэвлэлийн бага хуралд Байнгын хорооны дарга М.Оюунчимэг, Улсын Их Хурлын гишүүн Д.Тогтохсүрэн, Д.Сарангэрэл болон холбогдох албаны хүмүүс оролцсон.

Ээлжит чуулганы хугацаанд Улсын Их Хурлын дарга, гишүүд, Байнгын хороодод нийт 7231 иргэний 1233 өргөдөл ирүүлснээс 113 буюу 9,2 хувь нь нийтийн эрх ашгийг төлөөлсөн, 1120 буюу 90,8 хувь нь хувийн асуудлаар хандсан өргөдөл байна. Тус Байнгын хороо өнгөрсөн хугацаанд иргэдээс ирүүлсэн 277 өргөдлийг судлан 237 өргөдлийг эцэслэн шийдвэрлэж, 40 өргөдөл шийдвэрлэгдэх шатанд буюу хяналтын хугацаанд байгаа аж. Тайлант хугацаанд тус Байнгын хорооноос 126 албан бичиг явуулж, 132 албан бичиг хүлээн авч шийдвэрлэсэн байна.  Нийт таван удаа хуралдаж, долоон асуудлыг хэлэлцэн шийдвэрлэж, дөрвөн тогтоол, Байнгын хорооны хуралдааны тэмдэглэлээр нэг удаа Монгол Улсын Засгийн газарт үүрэг, чиглэл өгч иргэдийн өргөдлөөр тавигдсан асуудлыг шийдвэрлээд байгаа ажээ. 


Байнгын хорооны дарга М.Оюунчимэг мэдээллийнхээ эхэнд, Туул голын бохирлын асуудлаар иргэдээс ирүүлсэн өргөдлийн дагуу Байнгын хорооноос холбогдох байгууллага, албан тушаалтнаас тайлбар авах, мэдээлэл, судалгаа гаргуулах, газар дээр нь нөхцөл байдалтай танилцах, Ажлын хэсэг байгуулах, хэлэлцүүлэг хийх зэрэг үйл ажиллагааг явуулсны үндсэн дээр Монгол Улсын Засгийн газарт чиглэл өгөх 02,03 дугаар тогтоолын хэрэгжилтийг дүгнэв. Байнгын хорооны тогтоолын дагуу голын бургас модыг сүйтгэх, уул нураах зэрэг байгаль орчны төлөв байдал, байгалийн унаган төрхийг алдагдуулан дархан цаазат газрын нийтлэг горимыг зөрчин үйл ажиллагаа явуулж байгаа 56 иргэн, аж ахуйн нэгж, байгууллагын газар ашиглах эрхийг Байгаль орчин аялал жуулчлалын сайдын 2018 оны А/76, А/113, А/164 тоот тушаалаар цуцалсан байна. 

Байнгын хорооноос Богд хан уулын тусгай хамгаалалттай газар нутаг, Нийслэлийн ундны усны нэг том эх үүсвэр болсон Туул голын эрэг орчмын асуудлыг цэгцлэхийн тулд газар ашиглалт, барилга байгууламж, голын усны нөөц, газар чөлөөлөх зэрэг асуудлыг цогцоор нь авч үзэж, эрх зүйн зохицуулалтыг боловсронгуй болгох асуудлаар Монгол Улсын Засгийн газарт чиглэл өгсөн. Тухайлбал, эрх бүхий байгууллагаас олгосон зөвшөөрлийн дагуу барилга барьсан иргэн, хуулийн этгээдийг хохироохгүйгээр асуудлыг шийдвэрлэх, газар эзэмшигч, ашиглагчтай харилцан тохиролцсоны үндсэн дээр газрыг бүхэлд нь, эсхүл хэсэгчлэн солих буюу эргүүлэн авах, өөр газарт нүүлгэн шилжүүлэх, тусгай хамгаалалттай газар нутагт үүссэн суурьшлын бүсийн асуудлыг татварын бодлогоор зохицуулах шаардлагатай байна. Байгаль орчин аялал жуулчлалын яам газрын зөвшөөрөлгүйгээр эсхүл зөвшөөрөлтэй боловч гэрээнд заасан нөхцөл, болзлыг зөрчиж барилга барьсан, барилгын норм, стандартыг зөрчсөн, батлагдсан зураг төсөлгүй, эрх бүхий байгууллагын зөвшөөрөлгүй барьсан барилга байгууламжийг буулгах, барилгын ажлыг зогсоох ажлыг хийж эхэлсэн. Энэ бүхэн Өргөдлийн байнгын хорооны ажлын нэгээхэн үр дүн гэж үзэж болно гэж байлаа. 

Түүнчлэн тус байнгын хороонд 700 гаруй иргэдээс  “Түрээсийн орон сууцанд зорилтот бүлгийн иргэдийг хамруулах ажлыг зохион байгуулах журам” нь өндөр босготой, сонгон шалгаруулалтын ажил нь зорилтот бүлэгтээ хүрдэггүй, түрээсийн орон сууцны талаар нээлттэй мэдээлэл хомс, нэгдмэл удирдлагагүй, хүнд суртал ихтэй байна гэсэн гомдол ирүүлжээ. Иймд Байнгын хороо уг асуудлаар  хоёр удаа, Ажлын хэсэг дөрвөн удаа хуралдаж, “Буянт-Ухаа 2” хороололд Ажлын хэсгийн гишүүд нэг удаа ажилласан. Иргэдэд хямд өртөгтэй, чанартай сууцаар хангах төрийн бодлого, түрээсийн орон сууц, хөтөлбөрийг хэрэгжүүлэх, “ТОСК” ТӨҮГ-ын захиалгаар орон сууц барьж ашиглалтад оруулах гэсэн үндсэн үүргээ хэрэгжүүлж ажиллахыг "ТОСК” ТӨҮГ-т үүрэг болгохын зэрэгцээ цаашид зорилтот бүлэгт чиглэсэн хямд өртөгтэй, чанартай орон сууцыг олноор барих, шалгалтаар орон сууцны ус зайлуулах хоолой, автомашины зогсоол, граж, гэрэлтүүлэг, камержуулалт, СӨХ, сургууль, цэцэрлэг, өрхийн эмнэлэг, нэг цэгийн үйлчилгээ зэргийг цогцоор шийдвэрлэх зэрэг зөрчил, дутагдлууд илэрсэнийг дахин гаргахгүй байх талаар үүрэг болгожээ.

Түүнчлэн иргэдийн орон сууцанд хамрагдах нэгдсэн мэдээлийн сан бий болгох, иргэдийн түрээсийн орон сууцаа өөрийн өмчлөлд авах хүсэлтийн дагуу холбогдох журмуудад өөрчлөлт оруулах, дахин төлөвлөлтөөс хохирсон иргэдийн асуудал, ипотекийн 8 хувийн зээлийг үргэлжлүүлэн олгох чиглэлийг тус Байнгын хорооны тогтоолоор Монгол Улсын Засгийн газар, холбогдох яамдуудад өгөөд байна. Энэ бүхэнд Байнгын хорооны зүгээс хяналт тавьж ажиллахаар болов.


Байнгын хорооны дарга М.Оюунчимэг мэдээлэлдээ, “Утааны эсрэг ээж, аавууд” төрийн бус байгууллага, иргэдээс “Агаар, орчны бохирдлыг бууруулах үндэсний хөтөлбөр”-ийн хэрэгжилт, татан буугдсан “Цэвэр агаар сан”-гийн зарцуулалтын талаар хэлэлцүүлэх хүсэлт ирүүлсний дагуу Агаарын бохирдлыг бууруулахад зарцуулсан хөрөнгийн талаар холбогдох албан тушаалтнаас тайлбар, мэдээлэл авах хэлэлцүүлэг зохион байгуулсан. Хэлэлцүүлгээр “Цэвэр агаар сан” болон 2016-2017 онд агаарын бохирдлыг бууруулахад зарцуулсан хөрөнгө, хэрэгжүүлсэн төсөл, арга хэмжээ, аудитын дүгнэлт, цаашид авах арга хэмжээний талаар хэлэлцэж, Улсын Их Хурлын гишүүд, иргэд, байгууллагаас гаргасан саналыг тусгасан зөвлөмж гаргасан талаараа онцоллоо.  

Түүнчлэн тус Байнгын хороо  927 иргэнээс  аюултай хог хаягдал болох химийн бодис хадгалах зориулалттай хуванцар сав, нийлэг уутыг  ахуйн зориулалтаар өргөн хэрэглэдэг нь нийгмийн эрүүл мэндэд болон байгаль орчинд сөргөөр нөлөөлж байгаа төдийгүй орчныг бохирдуулж, иргэдийн эрүүл аюулгүй орчинд амьдрах эрхийг хөндөж байгаа асуудлаар ирүүлсэн өргөдлийг хэлэлцэж холбогдох асуудлаар арга хэмжээ авч хэрэгжүүлэхийг Монгол Улсын Засгийн газарт чиглэл өгөөд байна. Энэ дагуу Засгийн газраас өргөн хэрэглээний нэг удаагийн нийлэг уутыг 2019 оны гуравдугаар сарын 01-ний өдрөөс худалдаанд гаргах, хэрэглэхийг хориглосон арга хэмжээ аваад байна. Мөн химийн бодис хадгалах зориулалттай хуванцар сав, нийлэг уутны хор хөнөөлийн талаарх талаар иргэдийн мэдлэг дээшлүүлэх арга хэмжээг холбогдох яам, агентлагууд анхаарч ажиллаж байгаа аж. 


Харин Улсын Их Хурлын гишүүн Д.Тогтохсүрэн хэлсэн үгэндээ, хаврын чуулганы хугацаанд тус Байнгын хороо агаар, хөрс, усны бохирдол, хуванцар сав, нийллэг уут гээд байгаль орчинд сөргөөр нөлөөлж байгаа асуудалд илүүтэй анхаарч,  түүнийг  хамгаалах, нөхөн сэргээх чиглэлд шийдвэртэй ажиллаж ирсэн. Бид УИХ-ын чуулганы завсарлагааны хугацаанд Байнгын хорооны тогтоол, шийдвэрийн дагуу Засгийн газар, холбогдох яам, агентлагуудын зүгээс авч хэрэгжүүлж байгаа арга хэмжээний гүйцэтгэлд хяналт тавьж ажиллах болно гэдгийг онцолж байв.

Дараа нь  Улсын Их Хурлын гишүүн Д.Сарангэрэл нэмэлт мэдээлэл өглөө. Тэрбээр мэдээлэлдээ, өнгөрсөн хугацаанд тус Байнгын хороо олон жил ярьж ирсэн асуудлуудад илүү бодитой, үр дүнтэй ажилласан. Тухайлбал, Мэргэжлийн хяналтын ерөнхий газар, Эрүүл мэндийн яамнаас химийн бодис хадгалах зориулалттай хуванцар сав, нийлэг уутны хор хөнөөлийн талаарх иргэдийн мэдлэг, мэдээллийг дээшлүүлэхэд холбогдох арга хэмжээг авч ажиллаж эхэлсэн гэдгийг дурдлаа.

Ийнхүү мэдээлэл хийсний дараа Өргөдлийн байнгын хорооны дарга М.Оюунчимэг, УИХ-ын гишүүн Д.Сарангэрэл, Улсын Их Хурлын гишүүн Д.Тогтохсүрэн нар цаг үеийн асуудлаар сэтгүүлчдийн сонирхсон асуултад хариулснаар хэвлэлийн хурал өндөрлөсөн юм гэж УИХ-ын Хэвлэл мэдээлэл, олон нийттэй харилцах хэлтэс мэдээлэв.


Хуваалцах:

Холбоотой мэдээлэл