Хууль зүйн байнгын хорооны дарга Л.Мөнхбаатар тэргүүтэй төлөөлөгчид АНУ-ын Виржиниа мужийн Фэйрфакс орон нутгийн захиргааны удирдах зөвлөлийн дарга Жефри Маккей болон албаны хүмүүстэй 09 дүгээр сарын 29-ний өдөр уулзлаа.

Уулзалтын эхэнд Байнгын хорооны дарга Л.Мөнхбаатар Монгол, Америкийн хооронд дипломат харилцаа тогтоосон 35 жилийн хугацаанд хоёр улсын харилцаа бүхий л түвшинд гүнзгийрэн хөгжиж байгааг онцлон тэмдэглэв.

Мөн Улаанбаатар хот Колорадо мужийн Денвер хоттой, Ховд аймгийн Ховд хот Калифорниа мужийн Боррего Спрингс хоттой эгч дүүс хотын харилцаатай байдгийг дурдаад Виржиниа мужийн Фэйрфакс орон нутгийн захиргаатай олон талын харилцаа, хамтын ажиллагааг хөгжүүлэх саналтай байгаагаа илэрхийлэв.

Фэйрфакс орон нутгийн захиргааны удирдах зөвлөлийн дарга Жефри Маккей, Монгол Улсын хууль тогтоох дээд байгууллагын төлөөлөгчид орон нутгийн захиргаанд зочилж буйд талархал илэрхийлээд, Монголын талаас гаргах санал, санаачлагыг бүхий л талаар дэмжихээ мэдэгдлээ.

Ноён Жефри Маккей, Виржиниа мужийн Фэйрфакс, орон нутгийн захиргааны удирдах зөвлөл нь өөрийн харьяалах есөн дүүрэг тус бүрээс сонгогдсон гишүүн болон нийт иргэдийн санал асуулгаар сонгогддог даргаас бүрддэг төдийгүй тус зөвлөл нь боловсролын системийн чанар, хүртээмж, иргэдийн эрүүл, аюулгүй орчинд амьдрах нөхцөл, нийгмийн хамгаалал, орон нутгийн тогтвортой хөгжил, эдийн засгийн өсөлтийг хангах зорилгын хүрээнд тухайн жилийн төсвийг батлан, хэрэгжилтэд хяналт тавьж ажилладаг талаараа танилцуулсан.

Мөн тэрбээр, Фэйрфакс орон нутгийн захиргааны харьяа есөн дүүрэгт 1.170.033 хүн амьдардгийг тодотгоод цагдаагийн байгууллагын чиг үүрэг болон хэрэг зөрчлийг хэрхэн шийдвэрлэдэг талаар танилцуулсан хэмээн Хууль зүйн байнгын хорооны ажлын албанаас мэдээллээ.